人人都愿世界如童话，万千粉丝一直当视帝陈展鹏同视后胡定欣系天造地设嘅一对，论商业计算或花生指数，传吓绯闻完全冇坏，当事人都非常配合好识做，得闲就眉来眼去，含糊其词回应吓绯闻，奉旨打情骂俏，百利而无一害！只怪土地问题，陈展鹏即使系视帝亦要面对呢个问题，同港姐单文柔山长水又远上到山顶，都唔敢我和你去吹吹风，只焗喺车厢医肚都被断正！

瞓醒觉就Game over

唔想拖胡定欣落水嘅陈展鹏，惟有亲手「熄机」毁灭童话，宣布「冇追过冇拖过冇恋过胡定欣！」立场鲜明，唔单止出戏真系够钟散场，最重要系胡定欣被飞惯！胡定欣从来唔系玉女，而系烈女，一直以来都系容易被飞的女人，皆因性格如刁兰硬净，拎得起放得低，零拖泥带水，冇手尾跟！每次Game over，佢都话撇就撇，执袋起身，够爽够型，简直系甩拖易，男人要同佢甩拖真系好Easy！你见佢每段感情都唔会烂尾爆大镬，好嚟好去就知啦！大佬，一个男人要讲分手，都要睇女方咩料㗎，容乜易一哭二闹三上吊？

一夜之间激起陈胡两派粉丝嘅民愤，啱啱瞓醒都唔知发生乜事嘅胡定欣，擘大眼就见到陈展鹏同单文柔干柴烈火，自己就无啦啦「被分手」成头问号，谂住都系时候散场，唔想讲多错多，咪只答话大家一直系同事囉！点知两帮粉丝不停互片，球乱射，龙门乱搬，闹胡定欣划清界线兼唔送祝福，陈展鹏仲惨，硬食「劈腿」呢只死猫，不过话晒做过亚视，几恶啃都顶得住！

相比以前嘅「被飞」往绩，今次对胡定欣嚟讲简直湿湿碎兼畀晒面，完全顶得住！想当日拍拖两年嘅吴浩康见异思迁，转嗒庄思敏，胡定欣条气已经唔顺，点知庄思敏声泪俱下，声称畀人闹：「你都系着我旧鞋咋！八婆！」嗱！烈女不怕死，怕死嘅只会系八婆，胡定欣真系怕你有牙，咪声大大话有人老作博见报囉！有冇讲过都好，大家已经入晒脑，觉得此女子型到裂，非同小可，就算有讲过又点？喺情敌面前够胆理直气壮，型！呢铺胡定欣加晒分！之后佢同马国明分手，三姑六婆又走出嚟，话马国明系笋盘㖞，分得手即系胡定欣系港女啦！胡定欣天不怕地不怕，八婆点会怕？一于出刁兰本色神回：「吴浩康形象差，就话我好；马国明系笋盘，我就一定系次货㗎？」又啱数㖞！

陈展鹏与胡定欣的「恋情」一夜间玩完。

胡定欣与马国明。
 

胡定欣与吴浩康。

男人渴求英雄感

相信最令胡定欣O嘴汗颜，莫过于N年前被冠名为「姣精」！如果佢容许自己姣，一早姣出个未来，使乜挨到依家？太爷嗰代就开始占领西环经营海味舖，你𡁻紧山楂饼时，呢位「海味千金」已经瑶柱当零食，可惜家道中落，父母改行做司机同会计。佢明知世界艰难都甘愿贴地实干，可能系自细食尽鲍参翅肚，花胶汤当水饮，个底打得零舍好，佢入行15年嚟请嘅病假唔超过5次，咬实牙关默默耕耘，星途虽然比人走得慢，但理想始终达到。

胡定欣唔系绝色美人，但有一份横眉英雌气概，天跌落嚟当被冚，历尽风雨，练成淡定与从容，活脱脱系女汉子！35岁嘅佢硬朗洒脱如刁兰，即使赢得千万人崇拜，但相信佢最想崇拜嘅，系一个不再让你孤单嘅依靠，经历咁多段感情，虽然佢一口咬定爱得未曾后悔，但睇怕都要开始学识由女汉子变为小女人，先揾到有情人。只怪无论系大男人抑或小男人，心底都总有一份英雄感，想喺另一半面前伸出强而有力嘅臂弯。男人点都想Man，畀着你系陈展鹏，你觉得企喺胡定欣还是单文柔身边Man啲？

新闻：东网